Fundadóra no Patron
Koñese di'ak liután Fundadóra no Patron Kongregasaun CB
Maria Elisabeth Gruyters, moris iha Leut-Belgium iha loron 1 fulan Novembru tinan 1789 husi Nicolaas Gruyters no Maria Borde. Elisabeth hetan edukasaun no boot iha família ida ne’ebé sosiedade koñese no respeita, la’ós de’it tanba sira-nia rikusoin no pozisaun (nia aman mak kuidadu-na’in iha Puri Leut), maibé liuliu tanba sira-nia abertura no preokupasaun atu simu ema ne’ebé sai vítima husi funu durante Revolusaun Franseza.
Elisabeth mós sente impaktu husi Revolusaun Franseza. Oinsá susar atu hetan serbisu iha situasaun funu nian, nune’e hafoin nia aman nia mate, Elisabeth deside atu husik Leut iha tinan 1822 ba Maastricht-Olanda. Aparentemente situasaun iha sidade Maastricht ladún diferente. Refujiadu barak iha fatin hotu-hotu, iha ema kiak barak liután ne’ebé dezesperadu no laiha esperansa, saida liután, laiha serbisu karidade nian, enkuantu kustu impostu nian aas, sidade ne’e kontrola hosi ezérsitu, to’o igreja uza hanesan armajen ba fornesimentu sira.
Serbisu ba família Nijpels no hetan konfiansa nu’udar jestór ba família nia rikusoin hotu, la halo Elisabeth sai indiferente ba situasaun ne’ebé hale’u nia. Luta hasoru ema kiak no terus lori Elisabeth ba enkontru ida ho Maromak nia oin. Maizumenus durante tinan 16 nia laran, Elisabeth nia luta sira sempre akompaña ho saudades no matan-been (EZ. 9), loron no kalan…
“Ha’u harohan iha Maromak nia oin, se Maromak kontente, ha’u husu atu iha ne’e, iha sidade Maastricht, harii mosteiru ida, iha ne’ebé Maromak sei serbí ho laran-metin, ha’u la presiza hola parte iha ida-ne’e, enkuantu iha ema ne’ebé hakarak serbí Maromak ho laran-moos no perfeitu” (EZ. 5). Ho tulun husi P. Antonius van Baer, Dekanu St. Servaas, Maastricht, ikusmai Elisabeth nia hakarak atu harii konventu ida mosu. Iha loron 15 fulan Agostu tinan 1836, bainhira Elisabeth reza iha estátua Maria Fitun Tasi nian oin iha festa Maria nia asunsaun ba lalehan, Elisabeth nia saudades hetan resposta, “Ne’e sei akontese.” Iha festa St. Pedro hetan martiriu iha loron 29 fulan Abril tinan 1837, Elisabeth hahu Kongregasaun hodi serbi Maromak liu husi ema seluk nebe terus.
Iha Maiu 1837, Elisabeth hahú simu labarik kiak sira, ho objetivu atu harii fundasaun di ak iha sira-nia fuan, hodi fó lisaun relijioza sarani, kostura, orasaun no enkoraja sira ba espíritu santu moris nian (EZ. 51). Liuhusi ninia asaun simples maibé reál tebes mak Espíritu Santu halo serbisu, “Maromak di’ak haraik bensaun ba ita-nia serbisu”. Labarik kiak sira mai barak. Ema virtuozu hotu-hotu satisfeitu ho ida-ne’e” (EG 24).
Atitude fiar no espíritu luta nian ne’e mak halo Elisabeth nunka rende hodi luta ba dignidade umana nu’udar ilas Maromak nian. Espiritualidade husi Jesus Kristu nia oan-mane nu’udar atan Maromak nian ne’ebé fiel ne’ebé prontu atu terus tanba domin book no sai espíritu Kongregasaun CB nian iha prestasaun servisu ba ema kiak, terus, no ema ne’ebé iha susar iha moris. Iha loron 29 fulan Abril tinan 1837, Kongregasaun ne’e harii ofisialmente iha Maastricht, Olanda, no hetan aprovasaun husi Santa Sé durante Papa Pio IX nia ukun iha loron 14 fulan Dezembru tinan 1856 nu’udar kongregasaun apostólika iha S. Charles Borromeo.
Iha loron 26 fulan-Juñu tinan 1864 Elisabeth mate. Maski nune’e, nia espíritu, inspirasaun no espiritualidade moris nafatin, moris no enkarna hosi nia susesór sira. Impulsionadu husi karizma fundadór “Jezús nia domin inkondisionál no kompaixaun”, Irmán sira CB nian hamutuk halo viajen ba vizaun “Ema kiak sira, marjinalizadu sira no terus-na’in sira salva no liberta iha integridade Maromak nia reinu”, ne’ebé realiza hodi hala’o misaun “Atu estabelese relasaun kle’an ho Kristu iha moris kontemplasaun no dixernimentu kontínuu; sai sasin moris nu’udar atan Yahweh nian, serbí tan integridade umanidade nian atu nia sai liután Imajen Maromak nian nu’udar sinál Ninia prezensa nian; hatán ba dezafiu sira tempu nian ho ksolok no simplisidade hodi apoia sira”.
Carolus Borromeus, moris iha Kastelu Arona, Lago Maggiore, Milano, Itália iha loron 2 fulan-Outubru tinan 1538 nu’udar oan-mane dahaat hosi Ghiberto Borromeus no Margaretha de Medici. Maski nia mai hosi família nobre riku, Carlo, hanesan Carolus Borromeus hetan apelidu, moris simples, leál, badinas no ordenadu, no hamutuk ho nia família nia fahe beibeik domin no kuidadu ba ema kiak sira, labarik sira ne’ebé abandonadu, tau matan ba feto-faluk sira no mós oan-kiak ida.
Ho tinan 12, Carolus Borromeus haruka ba Milão no Pavia hodi estuda. Ho tinan 21, nia hetan doutoramentu rua iha tempu hanesan, maka direitu sivíl no direitu igreja nian. Carolus Borromeus nia exelénsia iha harii relasaun no maun-alin ho sé de’it mós komplementa ho ninia onestidade, hanoin ne’ebé ás no klaru, firme iha ninia desizaun sira, firme no metin iha hala’o ninia intensaun sira.
Iha tinan 1560, Carolus Borromeus hetan nomeasaun hosi Papa Pio IV nu’udar sekretáriu Vatikanu nian no iha papél boot iha prosesu preparasaun ba Konsíliu Trentu nian. Charles hetan ordenasaun nu’udar amlulik iha tinan 1563 ho tinan 25. Iha tinan hanesan, nia mós konsagra nu’udar Bispu Milão nian. Carolus Borromeus maka edukadór, konstrutór no reformadór. Aleinde reforma moris fiar no morál nian, nia mós harii semináriu sira ba futuru amlulik sira, harii asosiasaun/instituisaun edukasionál sira ba fiar labarik nian, ne’ebé koñesidu liu nu’udar “eskola domingu sira”.
Carolus Borromeus nia pozisaun nu’udar Bispu no Sekretáriu Vatikanu la halo nia sai arogante no arogante. Ho matenek no haraik-an, Carolus kontinua fó kuidadu no tulun ba nia povu no ema barak seluk ne’ebé presiza duni. Iha loron 3 fulan-Novembru tinan 1584, Carolus Borromeus mate, no nia mate-isin rai iha Katedrál Milano nian to’o loron 9 fulan-Novembru tinan 1584. Iha loron 1 fulan-Novembru tinan 1610, serimónia ofisiál ida santidade nian hala’o ba Saun Carolus Borromeus hosi Papa Paulo V iha Igreja Saun Pedro iha Roma.